Lege zaharreko enparantzatik Villabona Aiarekin lotzen duen errepide aldera abiatuko gara. Errepidea Panaderi (Errezil) etxearen ondoan zeharkatu eta zuzen jarraituko dugu, Amasaiturri baserriraino. Hor gurdibidea hartuko dugu eta, erreka gurutzatzean, igotzen hasiko gara. Lasa baserriko aztarnak pasako ditugu eta Malkorgainaren maldan dagoen Sagargaztegi baserrira iritsiko gara. Etxea inguratu eta porlanezko pista batetik Unbaranbe baserriraino helduko gara. Baserri hori pasatuta errepidea gurutzatuko dugu eta Eizleku eta Bordatxo etxeetara iritxiko gara. Horien parean Uretako aztarnak zeharkatzen dituen bidetik jaitsiko gara, Inkitako errekaraino. Puntu horretan ezkerrera hartuz Elizmendira helduko gara. San Pedro elizako eskailerak igo, tenplua inguratu eta pilotaleku txiki baten ondoan dauden eskaileretatik jaitsiko gara. Seroretxeko zubiaren azpitik pasa eta kalean behera jarraituko dugu. Beherago Santa Kruz baseliza ikusiko dugu gure eskuinean. Errepidera iristean, errepidea zeharkatu eta, Sagastume baserriaren aurrean, eskuinera hartuko dugu Abinazpi baserriraino. Hortik plazara Kale Nagusitik barrena bueltatuko gara.

• Iraupena: 1 ordu
• Luzera: 3.900 m
• Desnibela: 70 m