Abaltzisketako plazan, elizaren ondoan, hasiko duzu ibilbidea. Errepidez Larraitz-aldera abiatu eta, Ermentari Zaharra etxearen ondoren dagoen seinaleari jarraituz, ezkerrera hartuko duzu. Hormigoitutako bide batetik aurrera egin eta, Kareaga baserrira heldu baino lehen eskuinera, basabide batean sartuko zara. Hortik aurrera Larraitzeraino (beste informazio panela dagoen tokiraino) pagoen eta pinuen artean joango zara.

Bueltan, Urruzpilgo ordeka errepidez egin eta, justu bihurgunean, errepidearen goialdean ezkerrera dagoen Otarreko ibilbidea hartuko duzu. Tapa-tapa segi eta, Otarretik barrena, Otamendi bitarte, Altunetxe eta Etxeberriñe baserrien ondotik pasa ondoren, berriro errepidera aterako zara. Aurrerago segi eta, plazara heltzean, 2,8km-ko ibilbidea egina izango duzu. Ibilbide guztia ondo markatuta aurkituko duzu.